冷氣流 11月30日 星期四
就算堅叔去左美國,公司依然都係處於緊張作戰狀態,我份圖畫極都幗唔完,遲左一個星期都仲未可以出圖,堅叔臨走之前不斷叫我快D出圖,佢仲希望諗住等佢出發之前一日,交一份完整嘅圖比佢帶去美國開會之用,最後我當然冇貨交啦! 今日多左兩個人迫我交圖,第一個當然係大老闆啦,佢係出哂名嘅緊張大師,只要單工程有咩遲延的話,佢第一時間就會搵當事人傾計......而第二個係美國佬,美國佬send個e-mail過嚟,話佢大佬已經迫緊則師同工程師批圖,希望我地快ASAP(as soon as possible)出圖~
後記: 一樣的嘴巴有不一樣的說法。

普通 11月29日 星期三
今日返到公司第一眼就見到,見到一個平時呢個時間唔會見到嘅人,因為佢係長駐地盤嘅管工頭,正常嚟講朝頭早佢應該响屯門醫院開工,但係今朝竟然安坐公司睇報紙,我第一個諗法當然就係今日老闆要開大會......後來另一位地盤管工又返到公司,咁我就估得一D都冇錯喇,原來大老闆真係要開會,不過並唔係開咩咩大大會,只係大老闆想展示一下權力而且,只要老闆一句聲就能夠叫哂所有人返公司開會,而老闆嘅目的已經達到~
後記: 一樣的耳朵有不一樣的聽法。

再冷 11月28日 星期二
二老闆堅叔今晚就飛去美國,當然唔係為左旅遊啦,佢係為公事去嘅,不過並唔係人人都有份(冇可能),而我就可憐喇,為左老闆去一轉美國,今日趕圖趕到幾急呀,又要七點先收得工......今次嘅行程只有堅叔一個人去,雖然感覺上有少少唔公平,不過老闆都只係自己攞錢出嚟去旅遊,關我地小職員咩事先得......其實之前老闆都去過兩次美國,當然都係傾生意啦,今次又唔會去幾耐~
後記: 一樣的眼睛有不一樣的看法。

只有風 11月27日 星期一
為左應付香港同美國方面嘅工程,公司慢慢咁出現一大堆一大堆問題,人手不足係而家最為迫切,好似我咁樣嘅設計師,公司一共有三個,兩個搞美國同一個搞香港job,專門計數嘅工程師只得一千零一個,而其他同事都不值一提,兩個老闆終於肯請人喇......有條麻甩佬今晚走嚟見工,我睇佢一定係有嘢撈緊,如果唔係使鬼夜晚七點先嚟見工,而我仲聽到一個比較醒神嘅好消息,就係有女仔會嚟見工,不過就唔知幾時,所以呢幾晚都要夜D先收工~
後記: 知識就是力量；知識不但是力量，還能轉換為鈔票。

天灰 11月25日 星期六
如常地返工等放工,由於星期六半day off,所以距離收工時間感覺上會比平日快,其實由九點至到一點鐘係同平日一樣的,不,應該係話每日都一模一樣的,我講嘅只係感覺上,一如以往其他同事已經走哂,只係會得番我一個留守大本營,可能係以前舊公司星期六返全日,所以搞到我星期六係唔多想準時走人,大約我會留到兩點鐘左右,而奇怪就係我呢一粒鐘裡頭係完全唔會做公司嘢,有時發呆或者瞓覺都唔定,最重要就係做自己想做嘅事,而家仲未改變到呢種遲走嘅壞習慣,比自己多一點時間吧~
後記: A good book is like an unreachable itch. You just can't leave it alone. (好書就如觸不到的癢處，您無法置之不理。)

天陰 11月24日 星期五
新聞紙都賣哂出嚟,每日嘅頭條都話咩咩食品有毒,搞到成個香港都滿城風雨,一班師奶就最為頭痛,因為佢地跟本都唔知買咩好,樣樣都有毒喎,買呢樣又唔得,買呢又致癌......佢地每日進進出出街市,只要問一問老朋友(檔主)收風,邊種食物有事,邊種冇事都一清二楚,就近年來豬牛雞都分別驗出有問題,再嚟一個深海海鮮雪茄毒之後,今次輪到多寶魚出事,而好嘢一出現之後就一去不再,但係衰嘢總會係一不離二,多寶魚拖紅心蛋同時有問題,其實背後仲可能隱藏住好多問題,不過政府做事小市民冇過問嘅權利~
後記: 男人對女人要求，跟對內衣褲的要求一樣：一點支持，不太拘束。

出太陽 11月23日 星期四
每晚都要搞到好夜先去休息,慢慢變成習慣,如果未到十二點鐘跟本就冇諗到要休息,人人都話要早睡早起,可惜我做唔到......每次一閉上雙眼,就會不斷咁諗嘢,其實冇一特定嘅主題,工作呀,家庭呀,夢想呀,愛情呀,有時仲會唱吓歌,所以我唔會太早瞓,如果瞓唔著咁瞓嚟做咩呢? 不過我始終都係個人類,並唔係"廿四小時online星人",夜晚十二過後我點都會覺得眼瞓嘅,而到朝早七點半又要起身......趕返工,跟住就由朝做到黑,老實講我見到日光嘅時候真係小之有小~
後記: Hindsight. It's like foresight without a future. (事後諸葛亮，目不見睫。)

小雪 11月22日 星期三
終於都轉凍喇,前日新聞仲話緊今年十一月係近十年嚟最熱,點知只隔一個夜晚,就由廿六度急跌至十九度,仲落埋特大雨,我仲以為有風打咁so,咪又係食炸糊......諗落今年夏天真係勁長,我由四月開始換季,即係著返短衫,足足著左七個半月,而家仲著緊呀! 我屋企D短衫都著過幾十次,本來諗住就快冬天啦,咁就可以換季買冷天衫,再同幾件夏天衫say goodbye,唔通明知冬天仲走去買夏天衫咩~
後記: 今天，要在電視機安裝特殊晶片，才可防止孩子隨便看電視。在我的年代，我們不需要什麼晶片，媽媽就是晶片。

冷冷雨 11月21日 星期二
昨晚睇到一個搞笑廣告,起初見到一個字幕出現:「每朝七點半,都有以下的情況發生!」,之後就會見到一個趕住返工嘅"長髮醜男"行過,突然之間有另一位"肥醜男"跑响"長髮醜男","肥醜男"一手就捉住"長髮醜男"嘅右手,雙方展開一場爭奪戰......"咯喇"(骨碎聲)......"肥醜男"就將"長髮醜男"嘅右手搶去,跟住一個close up影住表情驚訝嘅"長髮醜男",最後由一位男性旁白講出:「am730 日日咁搶手」,之後最惡搞就係"長髮醜男"嘅身後,原來其他行人都搶緊其他行人嘅手......講真,呢個廣告嘅場面真係每朝都發生緊呀,我每朝返荔枝角落車之後,都會行經『am730』嘅報紙攤位,D男男女女真係搶報紙架,好彩我今朝都搶到手~
後記: I really do believe if you can live through remodeling a home, you can live the rest of your lives together. (夫婦如果裝修家居，還能相安無事，他們定能白頭到老。)

返風 11月20日 星期一
星期日得到放鬆一下嘅機會,總算充足電繼續用落去,不過好快又會電量不足夠,到底係使用得過量或者係充唔足呢? 我覺得兩樣都唔多似係,應該係我使用不宜嘅關係,自從兩年多前生活習慣開始改變之後,體內嘅充電器同時也產生變化,當然係向壞嘅方面轉變啦......直到我開始注意自身健康之後,我先發覺原來一直以來,我都比好大壓力自己,其實我何嘗唔想生活得輕鬆D呢? 當一個男仔要養起成頭家之後,一下子就變成一個男人之後,金錢加上工作帶來嘅壓力,讀大學嘅夢想幻滅,創業理想遙遙無期......不過我都仲未放棄,可惜現實就是如此~
後記: The only easy day was yesterday. (只有過去了的日子，才是輕鬆的日子。)